Timmisartumit assilisat nunap assingatut

ASL Environmental Sciences (ASL) Victoria-miittoq BC-iimi Canadami, neqeroortitsinermut suleriaaseq malillugu Namminersorlutik Oqartussani Aatsitassanut Naalakkersuisoqarfimmut isumaqatigiissuteqarpoq. Isumaqatigiissut taanna naapertorlugu, Kalaallit Nunaata kujasinnerusortaani Gardareqarfimmut aatsitassanut nunap assinganik suliaqarnissaq siunertaralugu, ASL-ip paasissutissarparujussuit silaannakkoorluni hyperspektralimik misissuinermeersut suliariniarpai misissoqqissaassallugillu.

Paasissutissat hyperspektraliusut tassaapput assit paasissutissat maligaasani takisoorujussuarni immiunneqarsimasut, taamaaliornermilu assit qalipaaterpassuarnut aggulunneqarsinnaapput. Qaqqami sumiiffinni aatsitassanik hyperspektralimik uuttortaanerit, silaannakkoorluni uuttortaanernut sanilliunnerisigut, sumiiffiit siusinnerusukkut aalajangersimasunik aatsitassanik nalunaarsuiffiusimanngitsut, nassaarineqarsinnaanerat periarfissaqarpoq.

Gardareqarfimmi aatsitassanik arlalippassuarnik nutaanik nassaarnissaq annertuumik periarfissaqarpoq, ilanngullugit aatsitassat qaqutigoortut. Gardareqarfiup ilaaniipput Ilimaussaq Intrusionen, aatsitassanik qaqutigoortunik akoqartoq aammalu tassani Greenland Minerals Ltd aamma Tanbreez Ltd aatsitassarsiorluni misissuinissamut akuersissutinik peqarput. Nunap immikkoortuaniipputtaaq sumiiffiit annikitsuinnarmik misissuiffigineqarsimasut aammalu aatsitassaqarsinnaanerat annertoorujussuarmik ilimanaateqartoq.

Gardareqarfimmi hyperspektralimik misissuinerit aammalu aatsitassanut nunap assiliorneq US Department of State-p aamma Aatsitassanut Naalakkersuisoqarfiup akornanni suleqatigiissutigineqarpoq.
Suliniumi immikkoortumi siullermiippoq paasissutissanik katersineq. Silaannakkoortunik aammalu nunami misissuinerit, 2019-imi juulip naalerneranniit aggustip aallartinneranut suliniummi suleqatigiinnit, tassaasunit Aatsitassanut Naalakkersuisoqarfik, US Department of State, US Naval Research Lab, US Geological Survey aamma Asiaq, ingerlanneqarput.

Suliniummi immikkoortup tullianiissapput hyperspektralimik misissuinernit paasissutissat suliarineqarnerat misissoqqissaarneqarnerallu. ASL-mi ilisimatuut suleqatigiit, misissueqqissaartartut, ujarassiuullu, paasissutissanik, nunap assinganillu arlalinnik Namminersorlutik Oqartussat suleqatigalugit, pissarsiaqartitsissapput.

Paasissutissat taakkua 2020-ip naalernerani tamanut saqqummiunneqassapput, akeqanngitsumillu pissarsiarineqarsinnaalissallutik. Tamatumani aatsitassarsiornermik suliaqartut paasissutissanik qaffasissumik pitsaassusilinnik nutaanik pissarsitinneqassapput, nunaniillu allaniit aningaasaliisarnerit, najukkamiillu suliffissaqartitsinerup siuarsarneqarnissaannut periarfissat pitsaanerulissallutik. Aatsitassarsiornermi inuussutissarsiutini nunanit allamiut aningaasaliisarnissaat Namminersorlutik Oqartussat pingaarnertut siunnerfigaat, taamaaliornikkut Kalaallit Nunaata aningaasaqarnera assigiinngisitaartinneqarsinnaassalluni.

ASL (siusinnerusukkut G.A. Borstad Associates) hyperspektralimik paasissutissanik katersinermi kiisalu paasissutissanik silaannakkoorluni silaannarsuakkoorlunilu misissuinerneersunik suliarinninnermut misissueqqissaarnermullu ukiut 40-it sinnerlugit misilittagaqarpoq. Paasissutissat, soorlu assersuutigalugu, imaani nunamilu avatangiisini alapernaarsuinermut, aatsitassanut nunap assiliornermut, allatigullu ilisimatusarnermut, atorneqarsinnaallutik.

Paasissutissat sukumiinerusut: Jørgen T. Hammeken-Holm, Pisortaaneq, Aatsitassanut Naalakkersuisoqarfik. Oqaras.: +299 34 68 46 Mail: [email protected]

Recommended Posts