Aatsitassanut periusissiaq nutaaq saqqummiunneqarpoq – 2020-2024-mi Kalaallit Nunaata Aatsitassat pillugit periusissiassaa

2020-2024-mi Kalaallit Nunaata Aatsitassat pillugit periusissiassaa Naalakkersuisunit akuerineqartoq immikkut suliniutinik tallimanik imaqarpoq. Immikkut suliniutit taakku aqqutigalugit aatsitassarsiorneq nukittorsarneqassaaq akuersissutinik pigisallit (aatsitassarsioqatigiiffiit) atugaasa pitsanngorsarnerisigut, kiisalu tamatuma saniatigut siunertaavortaaq suliffissat isertitallu amerlinerisigut, ilisimasaqarnerulernikkut allatigullu Nunatta annerpaamik iluaqutissarsinissaa.

Immikkut suliniutit:
1. Nunap sananeqaataa pillugu paasissutissanik siammaasarnerup pitsanngorsarneqarnera
2. Oqartussatut sullissineq angusaqarfiulluartartoq, siumut naatsorsuutigineqarsinnaasoq ammasumillu ingerlatsiviusoq
3. Misissueqqissaarnermit piiaanermut ikaarsaarneq pisariillisagaq
4. Pisuussutinik uumaatsunik atuineq piujuartitsineq tunngavigalugu ineriartortoq
5. Akileraarutitigut piiakkanullu akiliutitigut allanut unammillersinnaassuseq

Immikkut suliniarfissat tamarmik imminni aalajangersimasunik anguniagassaqarfiupput iliuusissartaqarlutillu piffissap periusissiorfiusup ingerlanerani piviusunngortinneqartussanik.

Aningaasaqarnermut Aatsitassanullu Naalakkersuisoq Vittus Qujaukitsoq: ”Aatsitassat pillugit periusissiamik nutaamik Naalakkersuisut saqqummiisinnaanerat nuannaarutissaavoq. Periusissiaq pisuussutinik uumaatsunik iluaquteqarnerup nunatta nappataanut pingaarnernut ilaalersinneqarnissaanik Naalakkersuisut kissaataannut naapertuuppoq. Periusissiami kikkut attuumassuteqartut tusaaniarluarsimavagut tamatta iluaqutissatsinnik Nunatta aatsitassarsiorfittut unammillersinnaanerusutut kajungernarnerusutullu inissisimalernissaa siunertaralugu”.

Ammasuuneq peqataatitsinerlu

Aatsitassat pillugit Periusissiap suliarineqarnerani Aatsitassanut Naalakkersuisoqarfik attuumassuteqartunik pingaarutilinnik qassiinik peqataatitsisimavoq. Taakku ilaatigut tassaapput akuersissutinik pigisallit (aatsitassarsioqatigiiffiit), kommunit kiisalu nunatsinni soqutigisaqaqatigiit kattuffiillu. Tamatuma saniatigut Inatsisartut Inuussutissarsiornermut Aatsitassanullu Ataatsimiititaliaat ilanngussaqartarpoq.

Periusissiaq Aatsitassalerinermut Oqartussaqarfiup nittartagaaniippoq – takuuk: Kalaallit Nunaanni Aatsitassanut Periusissiaq 2020-mit 2024-mut.

Sukumiinerusumik paasisaqarumaguit attaviguuk: Aatsitassanut Naalakkersuisoqarfimmi pisortaq Jørgen T. Hammeken-Holm. Tlf.: +299 34 68 46 Mail: [email protected]

Recommended Posts