Kujataani aatsitassat qaqutigoortut pillugit suliniutit marluk ingerlariaqqinneri

Aatsitassanut oqartussat, Tanbreez Mining Greenland A/S-ip, Greenland Minerals A/S-ip akornanni oqaloqatigiinneq, sulianut atatillugu, maanna ingerlariaqqilerunarpoq.

” Kujataani aatsitassat qaqutigoortut pillugit suliniutit marluk ingerlariaqqinneri nuannaarutigaakka. Suliniutit tamarmik periarfissaqaqaat. Suliniutit aallartinnissaannut pingaaruteqarpoq paasillugulu akuerinissaa, ilaatigut aatsitassat qaqutigoortut soqutigineqariartuaarneri piumaneqarnerilu atorluassallugit. Naalakkersuisut naatsorsuutigaat suliniutit marluusut aatsitassanut inatsimmi piumasaqaatinut piaartumik naapertuutilissasut, taamaalilluni Kujataata aatsitassaleriffinngornissaanut periarfissaqalissammat. Tamanna Kalaallit Nunaanni tamanut iluaqutaassaaq, immikkulli Kommune Kujallermut suliffissaqarnikkut iluaqutaassalluni.” Taama Aningaasaqarnermut Aatsitassanullu Naalakkersuisoq, Vittus Qujaukitsoq tulluusimaarluni oqarpoq.

Greenland Minerals A/S-mi Avatangiisinut Kingunissat pillugit Nalilersuinerit (VVM) inaarsarneqaleruttorput. Suliffeqarfiullu naatsorsuutigaa Aatsitassanik Suliassaqarfinnut Avatangiisinut Aqutsisoqarfimmut nalunaarusiaq piaarnerpaamik nassiunneqassasoq. VVM aatsitassanut inatsimmut naapertuuteriarpat, Naalakkersuisut tamanut ammasumik tusarniaanerit aallartissavaat.

1. januar 2020 aatsitassanut inatsimmi allannguut atuutilerpoq. Piiaanissamut akuersissummik pissarsiniaraanni, imminut akilersinnaassutsimik piiarneqarsinnaaneranik uppernarsaanissamut qularnaveeqqummut tunngatillugu siunnersuutip malittarisassaq peerpaa (Aatsitassanut inatsimmi § 29, imm. 2 takuuk). Piiaanissamut akuersissummik qinnuteqarnermi allaffissornerup pisariillisarnissaa allannguutip anguniarpaa. Qinnuteqartup aatsitassaqarfimmi peqarnera, nunat tamalaat aalajangersimasut akornanni nalunaartussaanermi piumasaqaatit malillugit suli takussutissiuisassaaq. Piiaanissamut akuersissummik pissarsiniarluni malittarisassat suleriaatsillu allat, ilaatigut inuiaqatigiinni avatangiisinilu kinguneqarnissaannut misissueqqissaarnerit, Aatsitassanut inatsisimmi nassuiarneqarsimasut allannguuteqassanngillat.

Aatsitassanut Naalakkersuisoqarfiup 2015-imili Tanbreez Mining Greenland A/S, Kujataani Killavaat Alannguani aatsitassanik qaqutigoortunik piiaanissamut akuersissuteqarfia pillugu oqaloqatigisimavaat. Tanbreez augustimi 2013-imi piiaanissamut akuersissummik qinnuteqarpoq. Qinnuteqaat 2015-imi, paasissutissat amigarmata, itigartinneqarpoq. Kingorna Tanbreez qinnuteqaammik suliareqqitamik nassiussisimavoq, naatsorsuutaavorlu piiaanissamut akuersissut pillugu isumaqatigiinniarneq aallarnerneqassasoq.

Sukumiinerusumik paasisaqarumaguit Aatsitassanut Naalakkersuisoqarfimmi pisortaq Jørgen T. Hammeken-Holm attavigineqarsinnaavoq Tlf.: +299 34 68 46 Mail: [email protected]

Recommended Posts