Naalakkersuisut aatsitassarsiorfiutileqatigiiffinnut ikiuupput

Isummernissamut tunngavissiaq, aatsitassarsiornermik suliaqartut aningaasaqarnikkut inissisimanerannik nukittorsaanissamik aammalu Kalaallit Nunaanni aatsitassarsiorluni misissuinermi soqutiginninnerup ingerlaannarnissaata qulakkeernissaanik siunnerfeqartoq, ulloq 30. april Naalakkersuisut akueraat.

Naalakkersuisut suliniutissat aalajangersimasut marluk akueraat:

  1. Piiaanissamut akuersissutinut aammalu aatsitassarsiorluni misissuinermi suliassanut ingerlallualereersimasunut tunngasunut suliassanik suliarinninnermut atatillugu aningaasartuutinut tunngatillugu, 2020-imi oqartussat suliarinninnerannut qaammatit pingasukkaarlugit akiligassiissutit akilerneqarnissaannik kinguartitsineq. Akiligassat 2. kvartal 2021-imi qaammatit pingasukkaat aappaasa naaneranni akilersinneqassapput.
  2. Qularnaveeqqusiissutip aningaasanngorlugu toqqorsivimmiitinneqartup ilaata, pisinnaatitsissummik pigisaqartunut, tamatuminnga qularnaveeqqusiussisimasunut, utertinnissaannut periarfissiineq. Qularnaveeqqusiissut ukiut marluk iluanni qularnaveeqqusiuteqqinneqassaaq.

Nunarsuarmi COVID-19-ip kingunerisaanik inissisimaneq aatsitassarsiornermik suliaqartuni aammalu Kalaallit Nunaanni pisinnaatitsissummik pigisaqartuni annertoorujussuarmik sunniuteqartoq, Aatsitassanut oqartussap aamma Naalakkersuisut paasinninnerat tunngavigalugu, taakkununnga akuersissuteqarneq pivoq. Aatsitassarsiorluni misissuinissamut pisussaaffiit 2020-mut 0 koruuninngorlugit annikillilerneqarnissaat Naalakkersuisut siusinnerusukkut akuerereerpaat. Suliniutissat annertunerusut taakkua ulloq 30. april akuerineqartoq pisinnaatitsissutinik pigisaqartut, pisuni unammillernartuni taakkunani, Kalaallit Nunaanni suliassaminnik attassiinnarnissaannut, iluaqutaassapput.

Suliniutissanut akuersissuteqarnernullu matuma siuliani allassimasunut tunngatillugu annertunerusunik apeqquteqarusunnermi attaveqarfigineqassaaq Aatsitassanut Aqutsisoqarfik, [email protected].

Recommended Posts