Aningaasaqarnikkut qasukkaaqqinnerit aatsitassarsiorluni misissuinissamut piumasaqaatinik 2021-mi aammalu akuersissuteqarfiusup piffissap sivitsorneqarneqarnerat

Isummernissamut tunngavissiaq Kalaallit Nunaanni aatsitassarsiorluni misissuinissamut akuersissutinut tamaginnut aatsitassarsiorluni misissuinermut piumasaqaatit qasukkartinneqarnissaat pillugu pissutsinut pingasunut tunngassuteqartoq Naalakkersuisut ulloq 17. august 2020 akueraat.

Pissutsini siulleq aatsitassarsiorluni misissuinissamut akuersissutinut tamaginnut, pisoqaassusaat apeqqutaatinnagu, aningaasaqarnikkut aatsitassarsiorluni misissuinissamut pisussaaffiit ukioq 2021-imi 0 DKK-nut annikillisinneqarnissaannut tunngassuteqarpoq.

Pissutsit aappaanni aatsitassarsiorluni misissuinissamut pisussaaffiit naammassineqanngitsut ukiumik ataatsimik kinguartinneqarnissaannut tunngassuteqarpoq.

Pissutsit pingajuat ukiup 2021 piffissamit akuersissuteqarfiusumit ilanngutinnginnissaanut tunngassuteqarpoq. Allatut oqaatigalugu tamanna isumaqarpoq ukioq 2021 ”unikkallartinneqarallassasoq” aammalu aatsitassarsiorluni misissuinissamut akuersissutit tamarmik ukiumik suli ataatsimik sivitsorneqarnissaannik malitseqassasoq.

Aatsitassanut oqartussat 2020-p ingerlanerani nunarsuaq tamakkerlugu COVID-19-ip ineriartorneranut qanimut malinnaanerat aammalu aatsitassarsiornermik suliaqartunut qanimut attaveqarnerat tunngavigalugu aalajangiisoqarpoq. COVID-19 pissutigalugu pisut qanoq ukiumi nutaami ineriartussanersut suli maannakkorpiaq ilisimaneqanngimmat, pisinnaatitsissummik pigisaqartut aatsitassarsiorluni misissuinermik suliassaminnut tunngatillugu isumannaariffiginissaat eqqissisimatinnissaallu siunertaralugu pissutsit pingasut matuma kinguliani allassimasut sivitsorneqarput.

Pissutsit pingasut matuma siuliani taaneqartut akuerineqarnerat 2020-p ingerlanerani Naalakkersuisut aalajangiinerannut nangissutaasutut eqqarsaatigineqarput.

Akuersissuteqarneq pillugu saaffiginnissutit Aatsitassanut Aqutsisoqarfiup pisortatigoortumik e-mailianut mlsa@nanoq.gl nassiunneqarsinnaapput.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest
Scroll to Top