Aatsitassanut ikummatissanullu inatsit

Aatsitassanut ikummatissanullu inatsit tassaavoq aatsitassanik ujaasinermut piiaanermullu attuumassuteqartunik suliarisanut tamanut toqqammavissatut inatsisaasoq (Aatsitassanut ikummatissanullu inatsimmut oqaaseqaatit).

Ulloq 1. januaari 2010-mi Aatsitassat pillugit ingerlatallu tamatumunnga pingaarutillit pillugit inatsisartut inatsisaat nr. 7, 7. december 2009-imeersoq (aatsitassanut ikummatissanullu inatsit) atuutilerpoq. Inatsit allannguutit makku ilaatillugit atuuttuuvoq.

Inatsisartut inatsisaat nr. 26, 18. decembari 2012-imeersoq

Inatsisartut inatsisaat nr. 6, 8. juuni 2014-imeersoq

Inatsisartut inatsisaat nr. 16, 3. juuni 2015-imeersoq

Inatsisartut inatsisaat nr. 34, 28. novembari 2016-imeersoq

Inatsisartut inatsisaat nr. 16, 27. novembari 2018-imeersoq

Inatsisartut inatsisaat nr. 39 , 28. novembari 2019-imeersoq

Uranimut inatsimmi uranimik misissueqqaarnissaq, aatsitassarsiorluni misissuinissaq piiaanissarlu, kiisalu isumalluutit misissorneqartut, aatsitassarsiorluni misissorneqartussat imaluunniit piiarneqartussat 100 ppm sinnerlugu uranimik akoqarpata, aatsitassanik allanik misissueqqaarnissaq, aatsitassarsiorluni misissuinissaq imaluunniit piiaanissaq, inerteqqutigineqarput (Uranimut inatsimmut nassuiaatit).

Uranimik il. il., misissueqqaarnermut, ujaasinermut piiaanermullu inerteqquteqarneq pillugu Inatsisartut inatsisaat nr. 20, 1. december 2021-mersooq ulloq 2. december 2021 atuutilerpoq. Inatsit atuuppoq.

Inatsimmi siunertaavoq Kalaallit Nunaanni uranimik piiaasoqannginnissaata imaluunniit uranimik Kalaallit Nunaanni piiarneqartumik tuniniaasoqannginnissaata qulakkeernissaa. Tamatuma saniatigut pinngoqqaatit allat assingusumik inerteqqutigineqarnerannik atuutsitsilernissamut kiisalu inatsimmut naapertuuttumik piiaasoqarsinnaanngippat akuersissutinik annikillisitsinissamut imaluunniit uterteqqunissaannut Naalakkersuisut inatsimmi piginnaatinneqarput.

Kalaallit Nunaanni privat-it nunamik peqarsinnaanngillat, nunatanik atuinissamut pisinnaatitaaffiit Namminersorlutik Oqartussanit aqunneqarput. Nunaminertami ataatsimi, inatsisit malillugit sulianut assigiinngitsunut, pisinnaatitaaffinnik Namminersorlutik Oqartussat tunniussisinnaapput. Ataaniittoq allagartaq uppernarsaat takuuk, paasissutissanik sukumiinerusunik pissarsiniarlutit.

Aatsitassarsiornermik suliaqarnermut atatillugu pisortat suliaqarnissaannut tamatigoortutut tunngavigisassanik aalajangiisutut toqqammavissatut inatsissatut atuunnissamik inatsit siunertaqarpoq. Tamatuma saniatigut nalunaarutini aalajangersakkanik, akuersissutini nalinginnarmik atugassarititanik, kiisalu immikkut ittutut akuersissutini atugassarititanik Namminersorlutik Oqartussat aalajangiisarnissaannut inatsit pisussaaffiliivoq. Inatsit najoqqutaralugu suliarisat isumannaallisaaneq, peqqissuseq, avatangiisit, isumalluutinik iluaquteqarneq, inuiaqatigiinnullu tunngatillugu piujuartitsineq sianigalugit isumannaatsumik suliarineqassanerannik, aammalu pissutsit assingusut atugaralugit nunat tamalaani periusaasoq pitsaasoq akuerisaq najoqqutaralugu suliarisat tamarmik suliarinissaat inatsisip qularnaarnissaat anguniarpai.

Kalaallit Nunaanni aatsitassanik ujaasinermut piiaanermullu atuuttunik inatsisinik malittarisassianillu Namminersorlutik Oqartussat pisinnaatitsissutinillu pigisaqartut malittarisassaqarput:

Pisortatigoortunut inatsisitigullu pituttuisunut inatsisinut taakkununnga, pisortatigoortumik inatsisilerinikkut allagaatinut kalaallisut danskisullu oqaasertalinnut uunga innersuussisoqarpoq: www. inatsisit.gl.

Scroll to Top