Qaqqat sisoornerinik alapernaarsuineq
Inuussutissarsiornermut Aatsitassanullu Naalakkersuisoqarfik Ujarassiornermut immikkoortortaqarfiup Kalaallit Nunaanni qaqqani qajannartortaasunik, innuttaasunut isumannaallisaanikkut aarlerinartorsiortitsisinnaasunik, misissueqqissaarnerit, ikkussuinerit alapernaarsuinerlu suliassarai.
Qaqqat sisoorsinnaanerisa nalilersornerat pillugu nalunaarusiaq nutaanerpaaq ugguuna aaguk.
Ujarassiuut pisariaqalertillugu nalilersuinerit nutaat akulikinnerusumik tamanut saqqummersittassavaat. Qaqqani sumiiffiit sisoorfiusut ajornartorsiorfiusussamik ineriartulissappata, ujarassiuut sukkulluunniit upalungaarsimanermut oqartussat attaveqarfigisassavaat.
Tamatuma saniatigut piffissaalluarallartillugu qaqqani qajannartortaasinnaasut paasisarnissaat siunertaralugu, ujarassiuut Kalaallit Nunaat tamakkerlugu qaqqanik misissuipput. Tassunga atatillugu najukkaneersut ilisimasaat pingaaruteqartorujussuupput. Kikkulluunniit qaarsuni sivinganernilu qajannartortalinnut attuumassuteqarsinnaasunik paasisaqartut, quppernermi matumani nalunaarutiginninnermut immersugassamik nassiusseqqullugit kaammattorpagut, iserfigiuk tuungassaq talerpiup tungaaniittoq toorlugu.
Nalunaarutigineqartut tamaasa immikkut misissoqqissaartarpagut akissuteqarfigisarlugillu, aammalu iluatinnaateqartorujussuarnik tapersiinissinnut qutsavigaatsigit.
Alapernaarsuinermut atatillugu sammisat assigiinngitsut pillugit uani paasisaqarnerusinnaavutit.
Sivinganernut sisoorfiulersinnaasutut aammalu pisimasunut nalunaarsorsimasunut internetsikkut nunap assinga
Nittartagaq suli ineriartortinneqarpoq, aammalu qaammatit aggersut ingerlaneranni paasissutissanut najoqqutassat annertunerusut takuneqarsinnaalissapput.