Ujarassiorit
Ujarassiorit sunaava?
Ujarassiorit tassaavoq innuttaasunut tamanut unammisitsineq, najukkami ilisimasat aammalu nunaqavissut ujarassiornermut soqutiginninnerat ukkatarineqarluni. 1989-mi ujarassiorit siulleq ingerlanneqarmalli Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfiup misissugassat 29.916-t tigusimavai, taakkunannga 5.352-t aatsitassannguussimasunik akoqarnerannut misissoqqissaarneqarsimallutik.
Ujarassiorit tassaavoq inuinnaat aatsitassarsiorlutik misissuinerat, aatsitassaqarfinnik nutaanik nassaarniarnissamut innuttaasut najukkani ilisimasaannik akuutitsinissamik atuinissamillu siunertaqartoq. Pisuni arlalinni misissugassat nassiunneqartut, aatsitassarsiorluni misissuinermut ingerlatseqatigiiffiit Kalaallit Nunaanni aatsitassarsiorlutik misissuinermik aallartitsinerannut pissutissaqalersitsisarsimapput. Tamatuma saniatigut Ujarassiorit Kalaallit Nunaanni innuttaasut akornanni atitunerusumik paasisimasaqalersitsisimavoq aammalu ujarassiornermut nalinginnaasumik soqutiginnilersitsisimalluni.
Peqataanissamut maleruagassat
Ujarassiorit ujarassiuujunngitsunut Kalaallit Nunaanni najugaqartunut taamaallaat atuuppoq. Ujaqqat misissugassat Kalaallit Nunaanneersuussapput, aammalu misissugassat eqqoqqissaartumik sumiiffii allanneqarsimasut akissarsitinneqarsinnaallutik.
Misissugassat nassiunneqartut unamminermut piukkunneqarsinnaanissamut 1. novembari tikitsinnagu tiguneqareersimassapput. Misissugassat Ujarassiorit ingerlanneqareernerata kingorna peqataasunut utertinneqartussaanngillat.
Misissugassat sumiiffinniit piiaanissamut pisinnaatitsissuteqarfioreersuniit tiguneqaqqusaanngillat, aammalu kommunimi maleruaqqusat malinneqartussaapput.
Ujarassiorimmi peqataasut Aatsitassanut ikummatissanullu inatsit naapertorlugu pisinnaatitaaffeqalertanngillat.
Ujaqqanik nassuiaaneq misissueqqinnaarnerlu
Misissugassat Aatsitassanut Inatsisillu Atuutsinneqarnerannut Naalakkersuisoqarfimmi ujarassiuunit ujarassiornikkut nassuiarneqartarput, aammalu peqataasunut ujaqqap suussusaa aatsitassartaasalu katitigaanerat pillugit akissuteqarluni allakkat akissutaasut nassiunneqartarlutik. Allakkat taakkua aamma ujarak nassiunneqartoq annertunerusumik misissoqqissaarneqartussanngorsimanersoq pillugu peqataasumut nassuiaassiviusarput. Misissugassat 20%-iisa missai laboratorianit piginnaaneqartunit sukumiisumik misissoqqissaarneqartussanngorlugit nunanut allanut nassiunneqartarput.
Misissueqqissaarnerup inernerisa tigoreernerisa kingorna peqataasut ujaqqat aningaasarsiutigineqarsinnaasunik aatsitassartaqarsinnaanerannik takussutissartaqarsinnaasut akui pillugit paasissutissinneqassapput.
Akissarsiassat
Ujarassiorimmi peqataasut eqqumaffigisassaat
Akissarsiaqarnissarnut periarfissatit annertunerulersikkit
Ujarassiorimmi siunertaasup ilaa tassaavoq, sumiiffinni misissuiffigineqarsimanngitsuusartuni nunap sannaa pillugu nutaanik ilisimasassanik katersinissaq, tassanilu ujaraatit misissugassaq pillugu eqqoqqissaartunik paasissutissiinissat pingaaruteqarpoq.
Karsit, nunap assingi immersugassallu pisortatigoortut sumiifferni allakkerivimmi pissarsiarisinnaasatit kisiisa atukkit.
Ujarak misissugassaq qaarsumi aalaakkaasuminngaaneersoq nassiuguk. Ujarak misissugassaq qaarsumi aalaakkaasuminngaaneeruni sumiiffimmi nunap sannaanik aamma geokemi-millu takutitsilluarnerusussaavoq. Ujaqqat maaniinnarmiittut nunap sannaani piffiit ingerlaneranni suminngaaneerfimminniik ungasissorujussuarmiilersimasinnaasarput.
Sumiiffik nassaarfiusoq allalerukku eqqoqqissaartissavat. Ujaqqap misissugassap nassaarinerani sumiiffia allassimanngippat ujarassiuunut taanna naleqartussaanngilaq, taamaattumillu ujaqqat misissugassat nassaarinerani sumiiffia allassimanngitsut ujarassiuut ujaqqanik nunap sannaatigut misissoqqissaarneqartussanik toqqaanialerneranni, taanna allerpaatinneqartussaavoq. Ujaqqat misissugassat sumiiffimmit ataatsimeersut karsimut ataasiinnarmut katersukkit. Misissugassat sumiiffinnit assigiinngitsuneersut nassiunniarukkit, taakkua tamaasa immikkut nassiutissavatit. Nunap assingi najoqqutassat ilanngullugit nassiunneqartussat immersugassallu tamaasa immikkut ataasiakkaarlugit immersoqqissaakkit.