Malittarisassiat

Kalaallit Nunaanni najugaqartunut inunnut annikitsumik aatsitassarsiornermik akuersissutinik Namminersorlutik Oqartussat nalunaaruteqartarput. Annikitsumik aatsitassarsiornermik akuersissuteqarnermigut pisinnaatitsissummik piginnittoq aatsitassarsiorsinnaavoq imaluunniit, Namminersorlutik Oqartussanit akuersissuteqarfigineqarnissaq tunngavigalugu, nassuiaassiffigisanik takornarianik angalatitsisinnaalluni. Kalaallit Nunaanni annikitsumik aatsitassarsiornermik akuersissutinut Aatsitassanut Aqutsisoqarfik akisussaaffilittut pisortaqarfiuvoq. Qinnuteqartut akuersissutit suussusiit marluk akornanni toqqagaqarsinnaapput: kisermaassisinnaatitaanermik pilimmik annikitsumik aatsitassarsiornermik akuersissut, imaluunniit kisermaassisinnaatitaanermik peqanngitsumik annikitsumik aatsitassarsiornermik akuersissut.

Kisermaassisinnaatitaanermik pilimmik annikitsumik aatsitassarsiornermik akuersissut

Kisermaassisinnaatitaanermik pilimmik annikitsumik aatsitassarsiornermik akuersissuteqarnikkut sumiiffimmi 1 km 2-imik annertussusilimmi aatsitassanik atortussiassanik (taamaallaat atortussiassat qinngornernik ulorianartortallit pinnagit) sunilluunniit tamanik ujaasisinnaatitaanermut imaluunniit piiaasinnaatitaanermut pisinnaatitsissummik piginnittoq nalunaarfigineqassaaq. Kisermaassisinnaatitaanermik pilimmik annikitsumik aatsitassarsiornermik akuersissuteqarnimut sumiiffimmi tamaani pisinnaatitsissummik piginnittoq kisimi ujaasisinnaatitaallunilu piiaasinnaatitaavoq. Tamatuma aamma nassataraa pisinnaatitsissummik piginnittut allat akuersissummik nalunaaruteqarfigereersimassaannut allanut (ingerlatseqatigiiffiit imaluunniit inuit) sumiiffinnut qinnuteqartoqrasinnaannginnera. Taamaattumik akuersissuteqarfiusunut nunap assinga misissoqqaartariaqarpaat.

Kisermaassisinnaatitaanermik pilimmik annikitsumik aatsitassarsiornermik akuersissutit:

  • Sumiiffimmut annertunerpaamik 1 km2-inik angissusilinnut atuupput
  • Ukiuni pingasuni atuupput
  • Sivitsorneqarsinnaapput

Kisermaassisinnaatitaanermik peqanngitsumik annikitsumik aatsitassarsiornermik akuersissut

Kisermaassisinnaatitaanermik peqanngitsumik annikitsumik aatsitassarsiornermik akuersissutikkut pisinnaatitsissummik piginnittoq kommunip ataatsip tamarmiusup sumiiffigisaani aatsitassanik atortussiassanik ujaasinissamut pisinnaatitsissummik nalunaaruteqarfiussaaq. Taamaattorli pisinnaatitsissummik piginnittut allat akuersissummik nalunaarfigineqareerfiini sumiiffinni aatsitassanik atortussiassanik pisinnaatitsissummik piginnittoq ujaasisinnaatitaanngilaq.

Kisermaassisinnaatitaanermik peqanngitsumik annikitsumik aatsitassarsiornermik akuersissut:

  • Kommunini tallimani taakkunani ataatsimi atuuppoq
  • Ukiuni pingasuni atuuppoq
  • Sivitsorneqarsinnaanngilaq

Piumasaqaatit tamatigoortut

Annikitsumik aatsitassarsiornermik akuersissummik nalunaarutisissaguni qinnuteqartup piumasaqaatit makku naammassissavai:

  1. 18-inik ukioqalereersimassaaq
  2. Kalaallit Nunaanni najugaqartuusutut nalunaarsugaasimassaaq
  3. Kalaallit Nunaannut tamakkiisumik akileraaruteqarnissamut pisussaaffeqassaaq, piffissamilu ataqatigiissumi ukiunik tallimanik sivisussusilimmi tamakkiisumik akileraaruteqarnissamut pisussaaffeqarsimassalluni
  4. Tamakkiisumik eqqartuussivinni piginnaaffeqassaaq, aammalu aningaasaatiminik tamakkiisumik atuisinnaatitaassaaq, ilanngullugu akilersuinermik unitsitsisimassanani, akiliisinnaajunnaarsimassanani imaluunniit assingusunik atugaqassanani.

Taamaattorli immikkoortup ilaa 3 najoqqutaralugu ukiuni tallimani ingerlatsivissamik pinngitsuuinissaq pillugu qinnuteqartuusup qinnutigisinnaavaa. Inummut tassungaannaq annertunerpaamik annikitsuimik aatsitassarsiornermik akuersissutit tallimat tunniunneqarsinnaapput.

Scroll to Top