Naalakkersuisoqarfiup ataaniittup Aatsitassanut Aqutsisoqarfiup akuersissutinik allaffissornikkut suliaqartarnerit tamaasa, aatsitassarsiornermik suliarisat, akuersissutinullu attuumassuteqartutut isumannaallisaanermut pissutsit, ilanngullugit nakkutilliinerit, misissuiartornernilu takusaasarnerit, isumagisarpai. Pisinnaatitsissummik piginnittut, allallu aatsitassanut ikummatissanullu inatsimmut ilaasut, Aatsitassanut Aqutsisoqarfimmik attaveqatigiittarput, Aatsitassanut Aqutsisoqarfimmit nalunaarutit, allagaatit aalajangiussinerillu tamaasa pissarsiarisarlugittaaq.
Suliassaqarfimmi periusissiamut naalakkersuinermullu, Kalaallit Nunaannilu aatsitassanut suliffeqarnermullu tunngatillugu, inatsisitigut tunngasortaanut tamakkununnga, Aatsitassanut Suliffeqarnermullu Naalakkersuisoqarfik akisussaasuuvoq. Aatsitassanut inuiaqatigiinni aningaasaqarnermut tunngasunut tamanut Naalakkersuisoqarfik akisussaasuuvortaaq, ilanngullugit inuiaqatigiinni piujuartitsineq pillugu nalilersuinerit (VSB), aamma illua’tungeriit pingasut akornanni isumaqatigiissutit (IBA). Naalakkersuisoqarfimmi Geologiimut Immikkoortoqarfik akuersissutit pillugit qinnuteqaatinut ilitsersuutinullu atatillugu geologiskimik pissutsit pillugit siunnersuisarpoq, geologiimut ilisimatusarnikkut paasissutissanik nutaanik pilersuisarpoq, nunat tamalaani Kalaallit Nunaanni aatsitassaatit saqqummiussuutiginissaat sulissutigisarluguttaaq.
Pinngortitamut Avatangiisinullu Naalakkersuisoqarfiup ataani Aatsitassanik Suliassaqarfinnut Avatangiisinut Aqutsisoqarfik tassaavoq aatsitassanik kulbrintinillu suliaqarnernut tunngatillugit avatangiisinut pissutsinut akisusaaffeqartutut aqutsisoqarnikkut pisortaqarfik, ilaappullu avatangiisinik pinngortitamillu illersuinerit, avatangiisinut tunngasuni taarsigassarsisitsisarnernut akisussaaffigisat, avatangiisinullu sunniutaasussanik nalilersuisarnerit.
Attavissaq: eamra@nanoq.gl
