Ineqarnermut, Attaveqaasersuutinut, Aatsitassanut, Inatsisit Atuutsitsinneqarnerannut Naligiissitaanermullu Naalakkersuisoq Naaja H. Nathanielsen ullumi Nuummi Greenland Science Week nalaani ilisimatusarneq pillugu ataatsimeersuarnermi ammaalluni oqalugiarpoq.
Oqariartuutigineqartut pingaarnersaat tassaapput ilisimatusarnerup pingaaruteqassusaa, taassumalu innuttaasunut, ingerlatseqatigiiffinnut allanullu soqutiginnittunut paasissutissiissutigineqarnissaa. Assersuutigalugu aatsitassarsiorluni misissuinermut aatsitassarsiorfissanullu aningaasaliisartunik kajumiginnilersitsiniarsinnaanissamut ilisimatusarneq pingaaruteqarpoq. Taamaattumik Aatsitassanut Inatsisit Atuutsinneqarnerannut Naalakkersuisoqarfik ukiut tamaasa nunap sannaanut ilisimatuussutsikkut suliniutit assigiinngitsut, aatsitassarsiornermik inuussutissarsiutilinnut nutaanik ilisimasaqalersitsisussat paasissutissanillu nalunaarsukkanik pissarsititsisussat, ingerlattarpai, taamaalillunilu ingerlatseqatigiiffiit aningaasaliinermi annaasaqarsinnaanerannik annikillisitseqataasarluni.
Aatsitassanut Inatsisit Atuutsinneqarnerannut Naalakkersuisoqarfimmi ilisimatusarnermi suliniutini ilaatigut ilaatinneqarput nunap sannaanut nunap assinginik nutaanik suliaqarneq aamma aatsitassanik ujaqqanillu assigiinngitsunik piiaanissamut periarfissaqarfiusunik nalilersuineq. Tassani Kalaallit Nunaanni, nunarsuup sinneratuut, aatsitassat pisariaqartinneqartut aamma CO2-mik toqqorsivimmiititsinissaq (CCS – Carbon Capture Storage) aamma ukkatarineqarput.
Taamaattoq ilisimatusarneq paasissutissiinermi ingerlateqqinneqanngikkuni naleqartussaanngilaq, aammalu paasissutissat nalunaarsukkat aatsitassarsiornermik inuussutissarsiutilinnut atugassiissutigiinnarnagit, kisianni aamma innuttaasunut ilisimasat pissarsiariuminartunngortinnissaat, Naalakkersuisup pingaartippaa. Taamaattumik Kalaallit Nunaanni meeqqat atuarfiini aammalu ilinniarnertuunngorniarfinni ilisimasat nunap sannaanut ilisimatuussutsimut tunngasut pitsaanerulersinnissaat Aatsitassanut Inatsisit Atuutsinneqarnerannut Naalakkersuisoqarfiup sulissutigaa.
Greenland Science Week paasissutissiisarnermut annertuumik tunngassuteqarpoq, aammalu ilisimatusarnermi festivaleqartitsinerup ingerlanerani ilaatigut ilinniarfiit aatsitassanut tunngassutilinnik oqalugiartussatut pisortani immikkut ilisimasalik atorsinnaasimavaat. Aatsitassanut Inatsisit Atuutsinneqarnerannut Naalakkersuisoqarfik aamma innuttaasunut soqutiginnittunut aatsitassarsiorneq sammillugu ulloqeqqasiortitsivoq, tassani aatsitassarsiorluni misissuinermut aatsitassarsiorfimmillu ingerlatsinermut tunngatillugu suliat ingerlasarnerat oqaluttuarineqarlutik. Tallimanngorpat ulloq 12. november nal. 12-16 Naalakkersuisoqarfik Katuami aatsitassanut nittarsaassiveqarluni aallartitaqassaaq, tassani nunap sannaa aatsitassallu oqaluuserineqarsinnaassallutik.
Greenland Science Week Nuummi ulluni 8.-14. november 2021 ingerlanneqarpoq. Ilisimatusarnermi festivaleqartitsinermi ilisimatusartut, inuussutissarsiortut, ingerlatsivimmi aqutsisut innuttaasullu akornanni oqaloqatigiinneq ammaanneqarpoq. Sapaatip akunnerata ingerlanerani pisut assigiinngitsorpassuit ilisimatuussutsimut tunngassuteqartut ingerlanneqarput, soorlu saqqummiinerit, isumasioqatigiinnerit, oqallinnerit, ataatsimeersuarnerit aamma workshop-inik ingerlatsinerit. Uani annertunerusunik paasisaqarit: scienceweek.gl.
Naalakkersuisup oqalugiaataa tamakkiisoq uani atuaruk GSW Åbningstale GRL-1
Paasissutissanik annertunerusunik piniarnermi attaveqarfigineqassaaq Naalakkersuisup allattaa Zakaria Saleh, lg.qonan@asaz, +299 587474.