Covid-19-ip nunarsuatsinni tuniluunnera nunarsuatsinni nunanilu tamalaani unammillernartoqarsimasoq nunatsinni aatsitassarsiornermut sunniuteqarpoq. Aatsitassarsiornermik suliat piffissap ilaani nunatsinni nunattalu avataani angallannerit killilersorneqarnerinik kiisalu nalorninartoqarneranik sunnerneqarmata tamanna suliniutinik inerisaanermut aammattaaq sunniuteqarpoq.
Ukiuni coronap tuniluuffigisaani 2020-mi 2021-milu misissuinissamut akuersissutit aallaqqaataaneertittussanngorlugit unitsinneqarallarput. Akuersissutit piumasaqaataat nalinginnaasut 2022-mi utertikkiartuaartinneqassapput.
Aatsitassanut Inatsisillu Atuutsinneqarnerannut Naalakkersuisoq Aqqaluaq B. Egede ima oqaaseqarpoq:
”Nualluutip nunarsuarmi tuniluunnerata kinguneri suli malugisinnaavagut, inuttut aamma suliaqarfimmi. Isumalluarnissamulli tunngavissaqarpoq. Taamaammat Naalakkersuisut aatsitassarsiornermik suliaqarfimmi covid-19 pillugu suliniutit unitsissallugit aalajangerput. Naalakkersuisut Kalaallit Nunaanni suliffeqarfiit sinaakkutissaannik isumannaatsunik pilersitsiumapput. Taamaammat siunissaq qaamasoq angujartuaarniassagatsigu suliniutit atorunnaarsikkiartuaarneqassapput.”
Aatsitassanut Ikummatissanullu Aqutsisoqarfik utertitsiartuaarneq pillugu 2022-mi aasap ukiallu ingerlaneranni akuersissutinik piginnittunut eqqugaasunut saaffiginnissaaq. Naalakkersuisut aatsitassarsiornermik suliaqarfimmi covid-19 pillugu suliniutaasa nalunaarsorneqarneri ataani takuneqarsinnaapput.
2020
- Misissuinissamut pisussaaffiit 100 %-imik annikillisinneqarput
- Misissuinissamut akuersissutit tamarmik ukiumik ataatsimik sivitsorneqarput
- Akiliinissamut killissarititaasut ilaat kinguartinneqarput
- Akuersissutinik piginnittut isumaqatigiissuteqarnikkut aallarteqqinnissamut, avatangiisinik nakkutiginninnermut kiisalu avatangiisinik nakkutilliinermut qularnaveeqqusiissutimik 50%-iisa iperarneqarallarnissaannik kissaateqarsinnaapput
2021
- Misissuinissamut pisussaaffiit 100 %-imik annikillisinneqarput
- Misissuinissamut akuersissutit tamarmik ukiumik ataatsimik sivitsorneqarput
2022
- Misissuinissamut pisussaaffiit 50 %-imik annikillisinneqarput
- Akuersissutinik piginnittut isumaqatigiissuteqarnikkut aallarteqqinnissamut, avatangiisinik nakkutiginninnermut kiisalu avatangiisinik nakkutilliinermut qularnaveeqqusiissutimik 50%-iisa iperarneqarallarnissaannik kissaateqarnikut akiliinissaannut killissarititaq sivitsorneqarpoq
Tusagassiorfiit saaffissaat
Naalakkersuisup allattaa Lars Salik H. Kielsen oqarasuaammut +299345317-imut sianerfigiuk lg.qonan@kasl-mulluunniit allaffigiuk