Canadami Aatsitassarsiornermut Ineriartortitsinermullu Kattuffik (Prospectors and Developers Association of Canada (PDAC)) 2022-mi ataatsimeersuartitsinermini nunarsuaq tamakkerlugu aatsitassanik misissuineq aatsitassalerinerlu pingaartillugit Torontomi Canadamiittumi katersortitsivoq. Aatsitassanut Inatsisillu Atuutsinneqarnerannut Naalakkersuisoqarfiup ukioq manna Aatsitassarsiornermut Ineriartortitsinermullu nersornaaserneqartoq saqqummiutissallugu nuannaarutigaa. Nersornaat suliffeqarfimmut inummulluunniit Kalaallit Nunaanni misissuinermik suliniutinik siuarsaanermut tamaviaaruteqartumut tunniunneqartarpoq, taannalu peqqissaartumik akisussaassusilimmillu sullissisinnaanermik nutaaliorsinnaanermillu takutitsisinnaasimavoq.
Greenland Anorthosite Mining ApS (GAM) suliniummik Majoqqaq Qaava Anorthosite project-imik pilertortumik ineriartortitsilernikuuvoq, taannalu Kitaani Qeqertarsuatsiaanit 12 km-nik ungasitsigisumiippoq. Suliffeqarfiup anorthosite-qarfik pitsaassutsimigut nunarsuarmi pitsaanerpaaq nassaarinikuuaa, isumalluullu 21.8 million tonsinik aallaqqaammut annertussuseqarpoq. Tamatumuunakkut CO2 –mik aniatitsinermik annikillisitsingaatsiarluni nunarsuarmilu mingutsaaliuinermut iluaqutaasunik suliffissuarni nioqqutissianik amerlaqisunik pilersitsinissamut aatsitassarsiortoqarsinnaavoq.
Suliniut aningaasalersuisunit kalaallinit nunanilu tamalaaneersunit amerlaqisunit tapersersorneqarpoq, taakkununngalu ilaapput: Greenland Venture, SISA Pension Fund, Vækstfonden aamma the Jean Boulle Group.
Nersornaat uunga tunniunneqarpoq: Mr. Claus Stoltenberg, CEO (GAM) tunniussisuuvorlu Mr. Jørgen T. Hammeken-Holm, Naalakkersuisoqarfimmi Pisortaq, Aatsitassanut Inatsisillu Atuutsinneqarnerannut Naalakkersuisoqarfik.