Qaqqanit alapernaanneqartunit paasissutissat katersorneqartut nutaat tunngavigalugit nalunaarutigineqarsinnaavoq piffissami qanittumi annertuumik qaqqanit sisoortoqarnissaa kingunerisaanillu navianaatilimmik mallersinnaanera maannakkut Uummannap Sulluani aarlerinartorsiutaanngitsoq. Taamaattorli qaqqat alapernaanneqartut qajannartoqarfiini ujaqqat nakkaasarnerat akulitsumik pisarpoq kiisalu sisoornerit minnerusut nunap assigini 1 aamma 2-mi aappaluttumik qalipaaserneqarsimasuni pisinnaanerisa ilimanassusaat annertuvoq. Sumiiffit pineqartut pallinnissaat innersuutiginanngilaq, tamanna navianarsinnaammat.
Qaammatip qaangiuttup ingerlanerani paasisanik eqikkaaneq
Alapernaasuinermit paasissutissat apriilip aallartinneraniit maannamut katersorneqartut takussuserpaat Umiammakku Nunaanni Kangerluarsummilu qaqqat qajannartortaarfiini nikikkiartornerit assigiinngissitaartumik annertussuseqarlutik ingerlaannarnerat.
Nikinnerit alapernaasuivinnit nalunaarsorneqartut nunap assigini ataaniittuni qalipaatinik ilisarnaaserlugit takuneqarsinnaapput (assi 1 aamma 2 takukkit): Sumiiffinni tungujortumik qalipaasikkani nikikkiartornerit nalunaarsorneqarsimapput, aappaluttumillu qalipaasikkat tassaapput sumiiffiit apriili 2024-ip ingerlanerani ujaqqanik nakkaasoqarfiullutillu minnerusunik sisoorfiutsiartarsimasut.
Marsip qaammataanituulli aprilip ingerlanerani qaqqani nakkutigineqartuni nikikkiartornerit ukiup 2023-ip naajartornaranut sanilliullugit arriinnerupput, taamattaarlu ujaqqat nakkaallutillu sisoortarneri akuttunerusumik pisarnikuullutik.
Ulluni kingullerni silaannaq kissarnerulersimavoq aputillu aakkiartornera aallartissimalluni. Silaannaap kissatsikkiartornera piffissap tulliuttup ingerlanerani nikikkiartornerit sukkatsinnerannik malitseqarsinnaavoq.
Qaqqat alapernaarsorneqartut pillugit naliliinerit tulliuttut juunip tallimaani 2024-imi saqqummiunneqassapput. Allannguutit aarlerinaateqartut pissappata pilertornerusumik nalunaarummik saqqummiussisoqassaaq.
