Ukiut marluk alapernaarsuineq ingerlareersorlu nalunaarusiamik saqqummertoqarpoq. Nalunaarusiap qaqqat sisoorsinnaaneri tassaarsuaqartitsisinnaanerilu nutaamik nalilersorpai ilanngullugulu Uummannami nunaqarfinnilu tassaarsuarmik qarsutsinerit killiffiinut missigersuutit nunap assiginut titartorneqarneri saqqummerput. Nalunaarusiaq ataani tuugassakkut aaneqarsinnaavoq.
Teknikkikkut nalunaarusiaq qaqqat sisoorsinnaanerinik takorluukkat, tassaarsuarmik qarsutsinermut missigersuutit nunap assiginut titartarneqarsimasut navianassutsinillu naliliinerit nutaat pillugit imalik aaneqarsinnaavoq uani.
Qaammatip qaangiuttup ingerlanerani paasisanik eqikkaaneq
Qaqqat alapernaanneqartunit paasissutissat qaammammi kingullermi katersorneqartut tunngavigalugit nalunaarutigineqarsinnaavoq piffissami qanittumi annertuumik qaqqanit sisoortoqarnissaa kingunerisaanillu navianaatilimmik mallersinnaanera maannakkut Uummannap Sulluani aarlerinartorsiutaanngitsoq. Taamaattorli qaqqat alapernaanneqartut qajannartoqarfiini ujaqqat nakkaasarnerat suli pisarpoq kiisalu sisoornerit minnerusut nunap assigini 2 aamma 3-mi aappaluttumik qalipaaserneqarsimasuni pisinnaanerisa ilimanassusaat annertuvoq. Sumiiffit pineqartut pallinnissaat innersuutiginanngilaq, tamanna navianarsinnaammat.
Alapernaasuinermit paasissutissat juunip aallartinneraniit maannamut katersorneqartut takussuserpaat Umiammakku Nunaanni Kangerluarsummilu qaqqat qajannartortaarfiini nikikkiartornerit assigiinngissitaartumik annertussuseqarlutik ingerlaannarnerat.
Nikinnerit alapernaasuivinnit nalunaarsorneqartut nunap assigini ataaniittuni qalipaatinik ilisarnaaserlugit takuneqarsinnaapput (assi 2 aamma 3 takukkit): Sumiiffinni tungujortumik qalipaasikkani nikikkiartornerit nalunaarsorneqarsimapput, aappaluttumillu qalipaasikkat tassaapput sumiiffiit juuni 2024-ip ingerlanerani ujaqqanik nakkaasoqarfiullutillu minnerusunik sisoorfiutsiartarsimasut.
Kangerluarsummi Umiammakku Nunaat 3-milu sisujartortuni allerni nikikkiartornerit annikitsumik sukkaliartornerat malugineqarpoq. 2024-imi juunip qiteqqunneraniilli silaannaap kissassusaa ataatsimut isigalugu qerinartumiit kissarneruvoq. Kissarnerulernera 2023-imi aasap aallartinnerani malugisat assingalugit qaqqat qajannartoqarfiini nikikiiartornerit sukkanerulerneranik ujaqqallu nakkaasarnerisa akulikinnerulernerannik malitseqarsinnaavoq.
Ujarassiortut qaqqanik alapernaarsuinermik suliaqartut asimi angalallutik sulisussaanerat pissutaalluni qaammatikkaartumik naliliinerit aggustimi septembarimilu saqqummiunneqassanngillat. Qaqqanili nakkutigineqartuni allannguutit navianaatillit malugineqassappata, tamanna piaarnerpaamik nalunaarutigineqassooq.
