Maannakkut nunap assinga qarasaasiakkoortoq aqqutigalugu toortaallutit Kalaallit Nunaanni aatsitassaqarfiit 1460-it ilisimaneqartut tamaasa pillugit paasissutissanik pissarsisinnaalerputit. Nunap assinga, aammalu aatsitassat ilisimaneqartut pillugit paasissutissat tassani ilaatinneqartut, nittartakkamut greenmin.gl-imut ikkussorneqarput.
Qarasaasiatigut paasissutissaasivinni immikkoortuni sisamani paasissutissat, siusinnerusukkut ataasiakkaarlugit iserfigineqartartut, maannakkut tamarmik ataatsimoortunngorlugit ataatsimoortinneqarput. Qarasaasiatigut paasissutissaasivik ingerlaavartumik nutarterneqartassaaq. Qarasaasiatigut paasissutissaasivimmut nutaamut tassunga siunertaavoq Kalaallit Nunaanni nunap sannaa pillugu ilisimasat ataatsimoortunngorlugit ataatsimoortinneqarnissaat, peqatigisaanillu soqutiginnittut tamatuminnga avitseqatiginissaat. Paasissutissat tamarmik akeqanngillat. 1950-ikkunniit maannamut Kalaallit Nunaanni nunap sannaatigut peqarfiit ilisimaneqartut tamarmik qarasaasiatigut paasissutissaasivimmi nalunaarsorneqarput.
Sumiiffinni ataasiakkaani soqutigisarni aatsitassarsiorluni misissuisimanerup oqaluttuassartai aamma qarasaasiatigut paasissutissaasivikkoorlutit nassaarisinnaavatit. Aamma allaaserisat peqarfinnik nassuiaaviusut atuarneqarsinnaapput – tassami allaaserisanut innersuussiviit iserfissiap ilaatut ilanngunneqarput. Tamatuma saniatigut nunap assinginik assilisanillu annertuunik najoqqutassaqarpoq.
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, oqarpoq: ”Neriuutigaara paasissutissat nalunaarsukkat ataatsimoortunngorlugit nutaamik ataatsimoortinneqarneranni, suliaqartut, aningaasaliisartut, ilisimatuut allallu soqutiginnittut isumalluutigut pillugit ilisimasanik nutartikkanik pissarsinissaat ajornannginnerulersinneqassasoq. Nunarsuarmi ilaatigut mingutsitsinngitsumut allanngoriartortitsinissamut aatsitassat amigaatigineqarput. Pisuussutit pigisagut pisariaqartitsinermut tassunga matussuseeqataasinnaapput. Taamaattumik aatsitassat pisuussutit pillugit ilisimasat ajornaatsumik pisariitsumillu pissarsiarisarnissaat aalajangiisuulluinnartumik pingaaruteqarpoq.”
Qarasaasiatigut paasissutissaasivik arlalinnik periuseqarluni ujaasiffigineqarsinnaavoq, ilaatigut nunami sumiiffinni sumiiffik aqqutigalugu, aatsitassaq aamma ukioq atorlugit.
Qarasaasiatigut paasissutissaasivik GEUS (De Nationale Geologiske Undersøgelser for Danmark og Grønland) aqqutigalugu ingerlaavartumik nutarterneqartassaaq. Iserfissiami paasissutissat nalunaarsukkat tamarmik Namminersorlutik Oqartussani qarasaasiatigut paasissutissaasivinnit assigiinngitsunit ataatsimoortunngorlugit allaaserineqartassapput.
Paasissutissanut nalunaarsukkanut iserfissiamit assersuutitut, assersuutigalugu Kangerlussuarmi Anorthorsit-inik peqarfik alakkarsinnaavat.
Iserfissiaq Namminersorlutik Oqartussanit aamma GEUS imit aningaasalersorneqarpoq.
Greenmin.gl-imi aatsitassanik peqarfinnut qarasaasiatigut paasissutissaasivimmit nutaamit assilisaq najoqqutassaq. Assilisaq Kangerlussuarmi Najaat / White Mountain-imi Anorthorsit-inut aatsitassarsiorfimmeersuuvoq. Assiliisoq: Hudson Resources Inc.