Alapernaarsuineq maanna ingerlanneqartoq aallaavigalugu nalunaarutigineqarsinnaavoq piffissami qanittumi qaqqat nakkutigineqartut annertummik sisoorfiusinnaanerat kingunerisaanillu navianaatilimmik mallersinnaanera Uummannap Sulluani maannakkut aarlerinartorsiutaanngitsoq. Sisoornerit nakkaanerillu annikitsut qaqqani qajannartortalinni nunap assingini 1 aamma 2-mi aappaluttunik nalunaaqutserneqarsimasuni pisinnaapput. Sumiiffiit taakku qanittuaniinnissaq inassutigineqanngilaq.
Nakkutiginninnermit paasissutissanik nalunaarsukkanik 2024-mi novembarip aallartilaarneraniit katersorneqartunik eqikkaaneq
Novbembarip aallartinneraniit alapernaarsuinermit takussutissaqartinneqarpoq Umiammakku Nunaanni qaqqani nakkutigineqartuni igammillu 2017-imi sisoorfiup qanittuani ujaqqat nakkaasarnerat assigiinngissitaartunik annertussuseqartunik arlaleriarluni pisarsimasoq. Ujaqqat nakkaasarneri pingaartumik qaqqat sivinganersaanni qajannarnersaannilu pisarsimapput, erngullu qerilluni qaartitsineratigut nakkaanerit pilertarsimasutut nalilerneqarput.
Ukiap ingerlanerani Umiammakku Nunaat 3-mi aamma Kangerluarsummi sisoorfiusinnaasut nikikkiartornerisa sukkatsilaarsimanerat takuneqarpoq. Ilanngullugu sisoorfiusinnaasut appasinnersaanni ujaqqat nakkaasarneri akulikinnerulersimapput. Tamannalu 2023-ip ukiaanerani pissutsinut assiguvoq.
Qaqqani nakkutigineqartuni nikinnerit ujaqqallu sisoorneri takuneqartut matuma kinguliani ilusiliaq 1-mi aamma 2-mi nunap assingani sumiiffittut qalipaatilittut takuneqarsinnaapput: Sumiiffinni tungujortumik nalunaaqutserneqartuni nikikkiartuaartoqarneranik malussarfiusimapput, sumiiffinni aappaluttumik qalipaatilinni sumiiffiit 2024-mi novebarip aallartinneraniilli arlalinnik ujaqqanik sisoorfiusimasut takutinneqarlutik.
Tullianik pissutsinik naliliineq saqqummiunneqassaaq pingasunngornermi, januaarip 8-nni 2025-imi. Kisianni ujaqqat innartaanni nakkutigineqartuni aarlerinartorsiortitsisumik allanngortoqassappat, tamanna siusinnerusukkut nalunaarutigineqassaaq.
