Alapernaarsuineq maanna ingerlanneqartoq aallaavigalugu nalunaarutigineqarsinnaavoq piffissami qanittumi qaqqat nakkutigineqartut annertummik sisoorfiusinnaanerat kingunerisaanillu navianaatilimmik mallersinnaanera Uummannap Sulluani maannakkut aarlerinartorsiutaanngitsoq. Sisoornerit nakkaanerillu annikitsut qaqqani qajannartortalinni nunap assingini 1 aamma 2-mi aappaluttunik nalunaaqutserneqarsimasuni pisinnaapput. Sumiiffiit taakku qanittuaniinnissaq inassutigineqanngilaq.
Nakkutiginninnermit paasissutissanik nalunaarsukkanik 2025-mi januaarip aallartilaarneraniit katersorneqartunik eqikkaaneq
Qaqqani nakkutigineqartuni nikinnerit ujaqqallu sisoorneri takuneqartut matuma kinguliani ilusiliaq 1-mi aamma 2-mi nunap assingani sumiiffittut qalipaatilittut takuneqarsinnaapput: Sumiiffinni tungujortumik nalunaaqutserneqartuni nikikkiartuaartoqarneranik malussarfiusimapput, sumiiffinni aappaluttumik qalipaatilinni sumiiffiit 2025-mi januaarip aallartinneraniilli arlalinnik ujaqqanik sisoorfiusimasut takutinneqarlutik.
2025-imi januaarip aallartinneraniit nakkutilliinermiit paasissutissat katersat takussutissartalerpaat ujaqqat nakkaasarneri Umiammakku Nunaanni Kangerluarsummilu arlaleriaq pisarsimammata assigiinngissitaartunillu annertussuseqartarsimammata. Qaammatip siuliani pissutsinik naliliineq kingulleq saqqummermammalli sivinganersaq alapernernaanneqartoq Kangerluarsuk Killermi ujaqqat nakkaasarnerisa akulikinnerulersimanerat malugineqarpoq. Sumiiffimmi tassanngaanniit qaqqap sivinganerata ilaa imaanut sisoorsinnaavoq. Nalilerneqarporli sisoorneq inoqarfinnut navianartorsiortitsinani Kangerluarsummi sisoorfimmut pineqartumut qanittumi malinnik pilersitsisinnaasoq.
Pissutsinik naliliineq tulliuttoq saqqummersinneqassooq pingasunngornermi martsip tallimaanni. Aarlerinartumilli allannguuteqassappat siusinnerusukkut nalunaaruteqarnissaq piumaarpoq.
