Piffissami matumani alapernaarsuinikkut takussutissaqartinneqanngilaq piffissami qanittumi qaqqat nakkutigineqartut annertummik sisoorfiusinnaanerat kingunerisaanillu navianaatilimmik Uummannap Sulluani inoqarfinni tassaartoqarsinnaara.
Ujaqqat nakkaaneri sisoornerillu annikinnerusut nunap assigatut ilusiliussani 1 aamma 2-mi aappalutumik nalunaarsorneqarsimasuni peratarsinnaasassapput. Sumiiffiit taakku qanittuaniinnissaq innersuussutigineqanngilaq.
Piffissami kingullermi qaammatinngortumi nalunaarsuinermik paasisat
Umiammakku Nunaat:
Umiammakku Nunaanni qaqqat sivinganerini nakuutigineqartuni alapernaarsuinermi takussutissaqartinneqarpoq suli sivinganerit nikikkiartornerat aamma ujaqqat nakkaasarnerat.
Piffissami maannamut qaammatinngulersumi akulikitsumik ujaqqat nakkaasarnerat sisoornerillu minnerusut igammik sivinganerup sisoorsinnaasup “Umiammakku Nunaat 1”-ip appasinnersaani pisarnerat alapernaarsuinermi maluginiarneqarpoq. Sivinganerup qaavata ukiup ingerlanerani qerisimasup aannera ilutigalugu sivinganermit ujaqqat nakkaasarnerat akulikinnerulersimavoq, kiisalu nikikkiartornerit ingerlaannartut sukkanerulernerat malugineqarluni. Pissutsillu taamak ittut ukiuni kingullerni aasaanerani malugineqartarput.
Kangerluarsuk:
Nikinnerit sukkaleriatsiarnerat sivingangeq “Kangerluarsuk Kangillermi” GPS-ikkut nalunaarsorneqarpoq. Tamannalu siorna ukiup taamaalinerani aamma nalunaarsorneqarnikuuvoq.
Sivinganermi immap killiganut qanittumi “Kangerluarsuk Killeq”-mi nikikkiartuaarnerit ingerlaavartut kiisalu akulikitsumik ujaqqat nakkaasarnerat nalunaarsorneqarput (ilusiliaq 2). Tassani sivinganerup nunataata qaarsuatalu sisujartortup iluitsuunerulluni ataatsikkut imaanut sisoorsinnaanera ilimagineqarsinnaavoq. Malilli tassannga pilersinneqartoq taamaallaat sumiiffimmi qanittumi tassaartitsisinnaavoq, inoqarfinnullu navianaateqarnissaa ilimagineqarani.
Qaammatip kingulliup ingerlanerani sumiiffiit ujaqqanik nakkaaffiusimasut kiisalu nikikkiartorfiusut ilusiliaq 1 aamma 2-mi qalipaatinik nalunaaqutserlugit nunap assingani takuneqarsinnaapput. Sumiiffiit tungujortumik nalunaaqutsikkat ingerlaaginnartumik nikikkiartuaarfiusimapput, sumiiffinnilu aappaluttumik nalunaaqutserneqarsimasuni ujaqqat nakkaasarsimallutik.
Qaammatikkaartumik naliliineq tulliuttoq pingasunngornermi juulip aappaanni 2025-imi saqqummiunneqassooq. Allannguutilli aarlerinaatillit pilissappata siusinnerusukkut nalunaaruteqartoqassaaq.
