Piffissami matumani alapernaarsuinikkut takussutissaqartinneqanngilaq piffissami qanittumi qaqqat nakkutigineqartut annertuumik sisoorfiusinnaanerat kingunerisaanillu navianaatilimmik Uummannap Sulluani inoqarfinni tassaartoqarsinnaara. Ujaqqat nakkaaneri sisoornerillu annikinnerusut nunap assiganut ilusiliussani 1 aamma 2-mi aappaluttumik nalunaarsorneqarsimasuni peratarsinnaasassapput. Sumiiffiit taakku qanittuaniinnissaq – nunami imaaniluunniit – innersuussutigineqanngilaq.
Qaammammi qaangiuttumi alapernaarsuinemit paasisat
Qaqqat sivinganerini alapernaanneqartuni ujaqqat nakkaaneri nikinnerillu nalunaarsorneqartut ataani ilusiliaq 1 aamma 2-mi nunap assinganut qalipaatinik ilisarnaaserlugit titartorneqarput. Qaammatit kingulliit ingerlaneranni sumiiffiit tungujortumik ilisarnaasikkat tassaapput sisujartornerit ingerlaannartut, sumiiffiillu ujaqqanik uteqqiattumik nakkaaffiusimasut aappaluttumik ilisarnaaserneqarsimapput.
Umiammakku Nunaat
Sapaatip akunnerini kingullerni sisamani alapernaarsuinukkut paasissutissat katersorneqartut takussutissaqartippaat Umiammakku Nunaanni qaqqat alapernaanneqartut sinaasa sisujartuinnarneri taakkunanilu ujaqqallu nakkaasarnerat suli pisarmat.
Piffissami pineqartumi malugineqarpoq nikikkiartornerit sukkanerulersimanerat ujaqqallu nakkaasarnerisa akulikillisimanerat. Pissutsit taamaannerat 2023-imi aamma 2024-imi ukiaanerani maluginiarneqartarsimavoq, ukiullu naajartornerani nunap qerilernissaata tungaanut pissutsit taamaaginnarnissaat ilimagineqarsinnaavoq. Annertuumilli qaqqanit sisoortoqalerneranut ersiutinik takussutissaqanngilaq.
Kangerluarsuk
Kangerluarsummi sivinganerup Kangerluarsuk Killeq-up sinerissamut qanittuani sisujartuinnarnerit ujaqqallu akulikitsumik nakkaasarnerat alapernaarsuinermi nalunaarsorneqarpoq (ilusiliaq 2). Sivinganerup taassuma ilaa iluitsuunerulluni ataatsikkut imaanut sisoorsinnaavoq sumiiffiullu qanitsuani tassaartitsisinnaalluni, tamannali sumiiffinnut inoqarfiusunut navianaateqassangatinneqanngilaq.
Nikikkiartornerit sukkassusaasa ukiup qanoq ilinera apeqqutaatillugu allanngorarnerat maanna ersarissumik takussutissartaqalerpoq (ilusiliaq 3), tassalu aasap aallartinnerani nikikkiartornerit sukkatsikkiartulertarput ukiallu ingerlanerani sukkanerusinnarlutik ukiuunerani arriillisarlutik. Kangerluarsuk Kangilleq-mi sivinganerit appasinnerusumiittut sisujartornerat sukkatsissimavoq, qatsinnerusortaatalu nikikkiartornera arriilleriarsimalluni.
Qaammatikkaartumik naliliineq tulliuttoq pingasunngornermi novemberip tallimaanni 2025-imi saqqummiunneqassooq. Allannguutilli aarlerinaatillit pilissappata siusinnerusukkut nalunaaruteqartoqassaaq.
