Piffissami matumani alapernaarsuinermi takussutissaqartinneqanngilaq piffissami aggersumi qanittumi qaqqat nakkutigineqartut annertuumik sisoorfiunissaat malitsigisaanillu inoqarfinnut najugaqarfiusunut navianaatilimmik tassaartoqarsinnaanera.
Qaqqat sivinganini nunap assingini 1 aamma 2-mi aappaluttumik nalunaaqutserneqarsimasuni sisoornerit nakkaanerillu annikinnerusut pisarsinnaapput. Nunami imaaniluunniit sumiiffinnut pineqartunut qanittumiinnissaq inassutigineqanngilaq.
Qaammammi qaangiuttumi alapernaarsuinemit paasisat
Qaqqat sivinganerini alapernaanneqartuni ujaqqat nakkaaneri nikinnerillu nalunaarsorneqartut ataani ilusiliaq 1 aamma 2-mi nunap assinganut qalipaatinik ilisarnaaserlugit titartorneqarput. Sumiiffiit tungujortumik ilisarnaasikkat tassaapput sisujartornerit ingerlaannartut, sumiiffiillu ujaqqanik uteqqiattumik nakkaaffiusimasut aappaluttumik ilisarnaaserneqarsimapput.
Umiammakku Nunaat
Alerpernaarsuiffiup innaallagialersorneqarnerata ajornartooqqanerani Umiammakku Nunaanni qaqqat alapernaanneqarnerat kaperlaap nalaani assinit ersarissunit alapernaarsuivimmit ullut tamakkiallugit pissarsiarineqartaraluartunit tunaartaqarani novemberip aallartinneraniit maannamut ingerlanneqarpoq. Paasissutissat periutsit marluusut allat atorlugit pissarsiarineqartarallarput:
- Timmisartumit alapernaarsuinerit Issittumi Illersornissaqarfik suleqatigalugu sapaatip akunnera allortarlugu ingerlanneqarpoq. Assit kingulliit decemberit 16-iat 2025-mersut allannguutinik annertuunik takutitsinngillat.
- Qaammataasanit radarimik uuttortaanernit allannguutinut takussutissanik misissuinerit ullut arfinillit allortarlugit suliarineqartarput, tassanilu silap qanoq innera qaqqallu qaavisa aputeqarnerat apeqqutaatillugu naliliisoqarsinnaasarluni. Paasissutissat kingulliit naammaginartumik pitsaassusillit decemberip 15-ianneersuupput, taakkulu qaqqanit sisoortoqarfiusinnaasuni allannguutinik annertuunik takussutissiinngillat.
Kangerluarsuk
Kangerluarsummi alapernaarsuivik teknikkikkut ajutoorfiunani pisarnermisut ingerlavoq. Sivinganerup Kangerluarsuk Killeq-up sinerissamut qanittuani sisujartuinnarnerit ujaqqallu akulikitsumik nakkaasarnerat alapernaarsuinermi nalunaarsorneqarpoq (ilusiliaq 2-mi aappaluttumik qalipaasersugaq). Sivinganerup taassuma ilaa iluitsuunerulluni ataatsikkut imaanut sisoorsinnaavoq sumiiffiullu qanittuani tassaartitsisinnaalluni, tamannali sumiiffinnut inoqarfiusunut navianaateqassangatinneqanngilaq.
Aammattaaq Kangerluarsuk Kangillermi GPS-imik siumiissusersiutit uuttortaatigineqartut takutippaat sivinganerup appasinnerusortaata sisujartuaarnerata sukkassusaa arriilliallakkiartulersimasoq – taamatullu 2024-ip 2025-illu aallartinneranni aamma pisoqarsimalluni.
