Qaqqat sisoornissaannik imaluunniit sumiiffinni inoqartuni navianartunik mallit qarsutsinissaannik annertunerusunik, qanittumi pisoqarsinnaanera aarlerinaateqanngitsoq nakkutiginninnermi takutinneqarpoq.
Qaqqaq innartaanni ilusiliaq 1-imi aamma 2-mi aappaluttumik nalunaaqutserneqartuni tassanngaannaq annikinnerusunik sisoornernik pisoqarsinnaavoq. Sumiiffiit aappaluttumik nalunaaqutsersimasut eqqaanni nunamiinnissaq imartaanniinnissarlu inassutigineqanngilaq.
Qaammatini kingullerni nakkutiginninnermit paasissutissanik eqikkaaneq
Qaqqat innartaanni nakkutigineqartuni ujaqqat sisoorneri nikikkiartuaarnerillu nalunaarsorneqartut sumiiffittut qalipaatilittut matuma kinguliani ilusiliaq 1-imi aamma 2-mi takutinneqarput. Sumiiffinni tungujortuni sisoortunik nikikkiartuaartoqartuaannarnera takutinneqarpoq, sumiiffinni aappaluttuni sumiiffiit qaammatip kingulliip iluani ujaqqanik sisooqattaartoqarfiusimasut takutinneqarlutik.
Umiammakku Nunaat
Umiammakku Nunaanni qaqqani nakkutigineqartuni suli pisoqartoq nakkutiginninnermi paasissutissat takutippaat. Ujaqqat nakkaasut ujaqqallu sisoortut kiisalu qaqqat innartaasa ilaanni arriitsumik, ataavartumik nikikkiartuaartoqartoq, takuneqarpoq. Tamanna pisoqarnerinut qaammatit siuliini takuneqartartunut naapertuuppoq (takuuk ilusiliaq 1).
Kangerluarsuk
“Kangerluarsuk Kangilleq”-mi GPS-eqarfinni nikikkiartuaarnerni sukkatsinnerit qaammammi kingullermi nalunaarsorneqarsimasut takutinneqarput, tamannalu ukiuni siusinnerusuni upernaamiit aasariartulernerani takuneqartartunut naapertuuppoq (takuuk ilusiliaq 2).
Pissutsinik naliliineq tulleq
Asimi suliaqarneq pisussaq pissutigalugu tullianik pisunik naliliineq aatsaat ulloq 2. september tamanut saqqummiunneqassaaq. Sumiiffinni nakkutigineqartuni ajornartorsiorfiusumik allanngortoqarluni pisoqassagaluarpat, nalunaarut siusinnerusukkut tamanut saqqummiunneqassaaq.
