2020-mut aatsitassarsiorluni misissuinernut pisussaaffiit 0 koruuninngorlugu annikillisikkallarneqarnerat

2020-mut aatsitassarsiorluni misissuinissamut akuersissutinut tamaginnut aatsitassarsiorluni misissuinissamut pisussaaffiit 0 koruuninngorlugit appartikkallarneqarnissaat pillugu Naalakkersuisut aalajangerput. Aalajangiineq taanna ingerlatseqatigiiffinnut, kisermaassisussaatitaalluni aatsitassarsiorluni misissuinissamut pisinnaatitsissummik pigisaqartuusunut, akuersissutip pisoqaassusaa apeqqutaatinnagu, atuuppoq (atugassarititaasut immikkut ittut tunngavigalugit aatsitassarsiorluni misissuinissamut akuersissutit ilanngullugit) aammalu piffissami 1. januar 2020 aallarnerfigalugu 31. december 2020 tikillugu ilanngullugulu aatsitassarsiorluni misissuinissamut pisussaaffinnut atuulluni.

Aatsitassanut oqartussap COVID-19-ip atuunnerata nunarsuarmi ineriartorneranut qanimut malinnaanera aammalu aatsitassarsiornermik suliffissuaqarnermut tamanna qanoq unammilligassaqartitsilernerata takusinnaanera tunngavigalugu, annikillisitsisoqarpoq. Aatsitassarsiorluni misissuinissamut pisussaaffiit 2020-mut annikillisinneqarneranni, ingerlatseqatigiiffiit Kalaallit Nunaanni ingerlatanik suliaqartut, niuerfimmi unammilligassartaqartumi suliassanik attassiinnarnissaannik, Aatsitassanut oqartussap aamma Naalakkersuisut ikiorniarsarai.

Aatsitassarsiorluni misissuinissamut pisussaaffiit annikillisinneqarnerisa saniatigut, suliniuteqarnerit allat marluk, aatsitassanut akuersissutinut pisinnaatitsissummik pigisaqartunik ikiuiffiusussat, Aatsitassanut oqartussap sulissutigai. Suliniuteqarnerit ilaat tassaavoq, pisinnaatitsissummik pigisaqartut aatsitassarsiorluni misissuinissamut aamma piiaanissamut akuersissutinik allaffissornikkut aqutsinermut oqartussat suliarinninnerannut akiliinissamik pisussaaffeqarnerisa kinguartinnissaa. Suliniuteqarnerup aappaa tassaavoq, aningaasat saliinissamut aamma avatangiisini alapernaarsuinissamut qularnaveeqqusiunneqartut tamakkiisumik ilaannaasumilluunniit utertikkallarneqarnissaat. Suliniuteqarnerit taakkua suli Naalakkersuisunit akuerineqanngillat. Suliniuteqarnerit taakkua pillugit aalajangiineq ulloq 19. april 2020 pissasoq naatsorsuutigineqarpoq.

Annikillisitsinerit pillugit annertunerusumik paasisaqarniaruit, inussiarnersumik takuuk Aatsitassanut Aqutsisoqarfiup pisinnaatitsissummik pigisaqartunut tamaginnut allagaa: Important information to all licensees (taamaallaat tuluttut)

Aatsitassarsiorluni misissuinermut pisussaaffiit annikillisikkallarnerat kiisalu suliniutit allat pillugit saaffiginninnerit Aatsitassanut Aqutsisoqarfimmut uunga e-mail: [email protected] imaluunniit suliassamik suliarinnittumut attuumassuteqartumut nassiunneqarsinnaavoq.

Share on facebook
Facebook
Share on google
Google+
Share on twitter
Twitter
Share on linkedin
LinkedIn
Share on pinterest
Pinterest
Scroll to Top