Inuiaqatigiinni Piujuaannartitsisumik Ingerlatsinermik Naliliineq (VSB)

Aatsitassanut inatsimmi aalajangersakkat §76 aamma §77, aatsitassarsiornermit inuiaqatigiinni aningaasaqarnikkut/isumaginninnikkut sunniutinut sunniutinik aalajangersaapput.

Aalajangersakkani taakkunani nassuiarneqarpoq aatsitassarsiornerit isumaginninnikkut atukkanik sunniuteqangaatsiarsinnaasunik Naalakkersuisut akuersitinnagit qinnuteqartoq Inuiaqatigiinni Piujuaannartitsisumik Ingerlatsinermut Naliliissasoq (VSB) VSB-mullu nassuiaasiorluni. Suliani taakkunani taamaallaat pineqarput aatsitassarsiorfimmik aatsitassanillu tunisassiornermik pilersitsineq, Naalakkersuisunit VSB-mut nassuiaat akuerineqarsimappat.

Inuiaqatigiinni Piujuaannartitsisumik Ingerlatsinermut Naliliineq (VSB)

VSB-mik nassuiaammi aatsitassarsiornermi suliat isumaginninnikkut atukkanik toqqaannartumik toqqaannanngitsumillu sunniutaasa nassuiarnerat nalilerneqarnerallu, kiisalu sunniutit sunniivigeqatigiinnerat sunniutillu annertusiartortumik sunniutaat nassuiarneqassapput. Nalinginnaasumik piumasaqaatip saniatigut Naalakkersuisunit aalajangerneqassaaq qinnuteqaammik pigisaqartoq qanoq piumaffigineqartigissanersoq:

  • sulisunik kalaallinik sulisoqarnermi
  • pilersuisunik kalaallinik atuinermi
  • aatsitassat piiakkat Kalaallit Nunaanni suliareqqaarneqarnerannut atatillugu

VSB-mut nassuiaatip taamaattumik nassuiassavaa, qinnuteqaasiornerup nalaani Kalaallit Nunaanni suliffeqarfinni sulisartullu atugaat tunngavigalugit, aatsitassarsiornermi sulisartut suliffeqarfiillu kalaallinit pigineqartut, Kalaallit Nunaannilu suliareeqqaarneq, qanoq akuutinneqartigissanerat. Takuuk Inuiaqatigiinni piujuaannartitsineq pillugu nalilersuineq (VSB) pillugu ilitsersuut.

VSB-iip suliarineqarnera

Tusarniaaqqaarneq

Kalaallit Nunaanni soqutigisaqartut (Kalaallit Nunaanni sulisartut suliffeqarfiillu) siusissukkut ilanngunneqarnissaat qulakkeerniarlugu, qinnuteqartoq VSB-mut suliassat allattorsimaffiannik missingersuusiussaaq.

VSB-mut suliassat allattorsimaffiannut missingiut aatsitassanut oqartussanut tunniunneqassaaq, kingornalu Namminersorlutik Oqartussat nittartagaanni www.naalakkersuisut.gl-imi ulluni 35-ini tusarniaassutigeqqaarneqassalluni.

Tusarniaaneq naammassippat, akuersissummik pigisaqartup soqutigisaqartut oqaaseqaataat, suliassat allattorsimaffiannut missingersuusiamut ilanngussorlugit iluarsaatissavaa. Qinnuteqartup suliassat allattorsimaffiat iluarsagaq aatsitassanut oqartussanut akuerisassanngorlugu tunniutissavaa.

VSB-iip
suliarineqarnera

Suliassat allattorsimaffiat iluarsaateqqitaq aatsitassanut oqartussanit akuerineqarpat, qinnuteqartoq Inuiaqatigiinni Piujuaannartitsisumik Ingerlatsinermik Naliliinermik suliaqassaaq (VSB-mut nassuiaat).

Tamanut
tusarniaaneq

VSB-mut nassuiaatissatut missingersuut annikinnerpaaffissatigut piumasaqaatinik naammassinnippat, Namminersorlutik Oqartussat nittartagaanni www.naalakkersuisut.gl-imi sapaatit akunnerini arfineq pingasuni, tamanut tusarniutigineqassaaq.

Sapaatit akunnerini arfineq pingasuni tusarniutigineqarnerani, qinnuteqartoq illoqarfinni nunaqarfinnilu aatsitassarsiornermit sunnerneqartussani, innuttaasunik ataatsimiititsisassaaq.

Tusarniaaneq naammassippat, qinnuteqartup VSB-mut nassuiaasiussaaq tusarniaanermi oqaaseqaatigineqartut aallaavigalugit. Tamassuma kingorna VSB-mut nassuiaat iluarsagaq aatsitassanut oqartussanut akuerisassanngorlugu tunniunneqassaaq.

Scroll to Top