Qaqqanit alapernaanneqartunit paasissutissat katersorneqartut nutaat tunngavigalugit nalunaarutigineqarsinnaavoq piffissami qanittumi annertuumik qaqqanit sisoortoqarnissaa kingunerisaanillu navianaatilimmik mallersinnaanera maannakkut Uummannap Sulluani aarlerinartorsiutaanngitsoq. Taamaattorli qaqqat alapernaanneqartut qajannartoqarfiini ujaqqat nakkaasarnerat akulitsumik pisarpoq kiisalu sisoornerit minnerusut nunap assigini 1 aamma 2-mi aappaluttumik qalipaaserneqarsimasuni pisinnaanerisa ilimanassusaat annertuvoq. Sumiiffit pineqartut pallinnissaat innersuutiginanngilaq, tamanna navianarsinnaammat.
Qaammatip qaangiuttup ingerlanerani paasisanik eqikkaaneq
Alapernaasuinermit paasissutissat marsip aallartinneraniit maannamut katersorneqartut takussuserpaat Umiammakku Nunaanni Kangerluarsummilu qaqqat qajannartortaarfiini nikikkiartornerit assigiinngissitaartumik annertussuseqarlutik ingerlaannarnerat.
Nikinnerit alapernaasuivinnit nalunaarsorneqartut nunap assigini ataaniittuni qalipaatinik ilisarnaaserlugit takuneqarsinnaapput (assi 1 aamma 2 takukkit): Sumiiffinni tungujortumik qalipaasikkani nikikkiartornerit nalunaarsorneqarsimapput, aappaluttumillu qalipaasikkat tassaapput sumiiffiit marsi 2024-ip ingerlanerani ujaqqanik nakkaasoqarfiullutillu minnerusunik sisoorfiutsiartarsimasut.
Nikikkiartornerit nalunaarsorneqartut piffissami ukiup 2023-ip naajartorneranut sanilliullugit maanna piffissami kingullermi sukkassusaat arriinnerupput, immikkoortortanilu arlariinni sukkassutsit affaannanngorsimallutik.
Kangerluarsummi assiliivik qaqqap sivingarnata allanngoriartorneranik alapernaarsuutaasoq marsip quligani ajoquteqarluni atorunnaarpoq, Avannaatali Kommunea Ukkusissarmiullu marluk suleqatiginerisigut marsip 28-ianni atoqqissinnaalerluni. Peqataasut ikiuunnerat qujassutigaarput.
Qaqqat alapernaarsorneqartut pillugit naliliinerit tulliuttut maajip aallaqqaataani 2024-imi saqqummiunneqassapput. Allannguutit aarlerinaateqartut pissappata pilertornerusumik nalunaarummik saqqummiussisoqassaaq.
